Эрлинг Холанд “Манчестер Сити”да янаям яхшироқ ўйнаши мумкинми? Бир қараганда, шунча гол ураётган ҳужумчининг янаям яхшироқ нима қила олиши мумкинлиги тасаввурга сиғмайди, аммо Тьерри Анри бу ҳақида қизиқ мулоҳаза билдирибди:

“Мен ҳужумда ўйнаганимда, бошида ҳаммадан нолир эдим, бу менга тўп узатмаяпти, мана буниси ўзим истаганимдек пас бермаяпти ва ҳоказо. Шунда Арсен Венгер айтди:

— Сен ўзингга савол бериб кўр яхшиси. Ростан ҳам Фредди Юнберг сенга худди Деннис Бергкампдек тўп узата олади, деб ўйлайсанми?

Шунда ўйлашни бошладим. Деннис қаерда бўлишимдан қатъи назар менга хоҳлаганимдек тўп узатади, демак ўша пайтда истаган томонимга очиламан. Робер Пирес  “бир тепар” усулда ўйнашни ёқтиради, шунинг учун тўп унда бўлганида, яқинроқ боришим керак. Юнберг агар мен у кириб борган худуд қаршисида бўлмасам, мени кўрмайди, демак, ўша паллада мен унинг мени пайқашини таъминлашим керак. Мен ҳар бир жамоадошимнинг камчилигини юзага чиқариш ўрнига, кучли жиҳатларига мослашишга уриндим.

Эрлингга эътибор беринг. “Сити”нинг ҳар бир ҳужумида у ўзининг одатий олдинга ҳаракатланишини бошлайди. Аммо таркибда фақат Де Брюйне исталган худудга тўпни кўнгилдагидек узатишга қодир. Масалан, Бернарду Силва кўпроқ майда паслар орқали ўйнашни яхши кўради.

Шунинг учун, ўйлашимча, Эрлинг ҳозир тўп назорат қилинаётганда жамоадошларидан эмас, асосан ўзидан келиб чиқиб ўйнамоқда", — деди Анри.

Ростан ҳам, жуда қизиқ кузатув, тўғрими?

Қаҳрамон Асланов.