Erling Xoland “Manchester Siti”da yanayam yaxshiroq o‘ynashi mumkinmi? Bir qaraganda, shuncha gol urayotgan hujumchining yanayam yaxshiroq nima qila olishi mumkinligi tasavvurga sig‘maydi, ammo Tyerri Anri bu haqida qiziq mulohaza bildiribdi:

“Men hujumda o‘ynaganimda, boshida hammadan nolir edim, bu menga to‘p uzatmayapti, mana bunisi o‘zim istaganimdek pas bermayapti va hokazo. Shunda Arsen Venger aytdi:

— Sen o‘zingga savol berib ko‘r yaxshisi. Rostan ham Freddi Yunberg senga xuddi Dennis Bergkampdek to‘p uzata oladi, deb o‘ylaysanmi?

Shunda o‘ylashni boshladim. Dennis qayerda bo‘lishimdan qat’i nazar menga xohlaganimdek to‘p uzatadi, demak o‘sha paytda istagan tomonimga ochilaman. Rober Pires  “bir tepar” usulda o‘ynashni yoqtiradi, shuning uchun to‘p unda bo‘lganida, yaqinroq borishim kerak. Yunberg agar men u kirib borgan xudud qarshisida bo‘lmasam, meni ko‘rmaydi, demak, o‘sha pallada men uning meni payqashini ta’minlashim kerak. Men har bir jamoadoshimning kamchiligini yuzaga chiqarish o‘rniga, kuchli jihatlariga moslashishga urindim.

Erlingga e’tibor bering. “Siti”ning har bir hujumida u o‘zining odatiy oldinga harakatlanishini boshlaydi. Ammo tarkibda faqat De Bryuyne istalgan xududga to‘pni ko‘ngildagidek uzatishga qodir. Masalan, Bernardu Silva ko‘proq mayda paslar orqali o‘ynashni yaxshi ko‘radi.

Shuning uchun, o‘ylashimcha, Erling hozir to‘p nazorat qilinayotganda jamoadoshlaridan emas, asosan o‘zidan kelib chiqib o‘ynamoqda", — dedi Anri.

Rostan ham, juda qiziq kuzatuv, to‘g‘rimi?

Qahramon Aslanov.