"Тоттенхэм" ҳужумчиси Ришарлисон "Милан" билан турнирнинг 1/8 финал жавоб ўйинида (0:0) уйдаги дурангдан сўнг жамоадаги ўрнидан норози эканини айтди.

"Милан" "шпорлар"га қарши биринчи ўйинда 1 та гол фарқи билан ғолиб бўлгани учун кейинги босқичга чиқди. Футболчи ўйинда 70-дақиқада майдонга тушди.

"Нега захирада ўтирганимни тушунмаяпман. Мен учун ҳаммаси яхши ўтди, ажойиб давр келди, биз “Вест Хэм” ва “Челси”ни мағлуб этдик. Ва бирдан улар мени захира ўриндиғига ўтиргизиб, "Вулверхэмптон"га қарши ўйинда беш дақиқага майдонга туширишди. Мен сўрадим: "Нега шундай?" Аммо жавоб олмадим", - дея Ришарлисоннинг сўзларини келтиради ESPN.com.br.

У мураббий нега уни захира ўриндиғида қолдирганини тушунмаганини айтди.

“Бу мавсум, мен ўйнамаганим учун шунчаки аҳмоқона ҳолат. Менга жароҳат халақит берди, аммо ҳозир майдонга тушиб, жонимни беришга тайёрман. Икки ўйинни яхши ўтказдим. Ўйлайманки, мен асосий таркибда бўлишга лойиқман", - дея қўшимча қилди Ришарлисон.