Юртимизда давом этаётган U20 Осиё кубогининг дастлабки чорак финал баҳси якунига етди. Унда Ироқ Эронни сўнгги дақиқаларда урилган гол эвазига мағлуб этди. 

Ушбу учрашувдан сўнг ҳар икки жамоанинг мураббийлари матбуот анжуманида иштирок этди. Қуйида уларнинг фикри билан танишиб чиқасиз.

Эрон мураббийи Самад Марфави қуйидаги фикрларни билдириб ўтди. 

«Икки кучли ва бир-бирига яқин даражадаги жамоалар жангги кечди. Баҳс жуда муҳим эди, жисмоний ва руҳий яхши ўйнадик. Ироқ тартибли ҳимояланди. Битта вазият ҳаммасини ҳал қилди. Дастлаб барчаси яхши кетаётганди. Ноқулай пайтда гол ўтказиб юбордик, сўнгги дақиқаларда. Консентрация камлиги панд берди.

Иккала жамоа ҳам бемалол ЖЧга арзир эди. Уларда вазият кўп бўлмади. Бироқ битта гол ҳаммасини ўзгартириб юборди», - деди мураббий.

Шунингдек, матбуот анжуманининг иккинчи қисмида ғолиб Ироқ жамоаси мураббийи Эмад Муҳаммад ҳам иштирок этди.

Ўйин ҳар хил темпда ўтди, бироқ якун чиройли бўлди. Асосан қарши ҳужумларга таяндик. Гол узун пас натижасида келиб чиқди. Эрон албатта, жарима зарбаларида жуда кучли муаммо туғдирди. Бироқ майдон марказини бошқаришга ҳаракат қилдик. Барча ўзгартиришларим ўзини оқлади. Умуман иккинчи таймда супер ўйин ўтказдик. 12 йил давомида қилган хатоларимизни тўғрилаб келдик. Ироқ аҳолисини табриклайман. Имкониятимизга ишонмаганлар ҳам бўлганди, мана, буёғи тарихга айланди. Бу узоқ йиллар давомида шаклланган жамоа. Энди ҳар бир босқичда кучайиб борамиз», - деди мураббий.