Yurtimizda davom etayotgan U20 Osiyo kubogining dastlabki chorak final bahsi yakuniga yetdi. Unda Iroq Eronni so‘nggi daqiqalarda urilgan gol evaziga mag‘lub etdi.
Ushbu uchrashuvdan so‘ng har ikki jamoaning murabbiylari matbuot anjumanida ishtirok etdi. Quyida ularning fikri bilan tanishib chiqasiz.
Eron murabbiyi Samad Marfavi quyidagi fikrlarni bildirib o‘tdi.
«Ikki kuchli va bir-biriga yaqin darajadagi jamoalar janggi kechdi. Bahs juda muhim edi, jismoniy va ruhiy yaxshi o‘ynadik. Iroq tartibli himoyalandi. Bitta vaziyat hammasini hal qildi. Dastlab barchasi yaxshi ketayotgandi. Noqulay paytda gol o‘tkazib yubordik, so‘nggi daqiqalarda. Konsentrasiya kamligi pand berdi.
Ikkala jamoa ham bemalol JCHga arzir edi. Ularda vaziyat ko‘p bo‘lmadi. Biroq bitta gol hammasini o‘zgartirib yubordi», - dedi murabbiy.
Shuningdek, matbuot anjumanining ikkinchi qismida g‘olib Iroq jamoasi murabbiyi Emad Muhammad ham ishtirok etdi.
O‘yin har xil tempda o‘tdi, biroq yakun chiroyli bo‘ldi. Asosan qarshi hujumlarga tayandik. Gol uzun pas natijasida kelib chiqdi. Eron albatta, jarima zarbalarida juda kuchli muammo tug‘dirdi. Biroq maydon markazini boshqarishga harakat qildik. Barcha o‘zgartirishlarim o‘zini oqladi. Umuman ikkinchi taymda super o‘yin o‘tkazdik. 12 yil davomida qilgan xatolarimizni to‘g‘rilab keldik. Iroq aholisini tabriklayman. Imkoniyatimizga ishonmaganlar ham bo‘lgandi, mana, buyog‘i tarixga aylandi. Bu uzoq yillar davomida shakllangan jamoa. Endi har bir bosqichda kuchayib boramiz», - dedi murabbiy.
