Сентябрь ойининг иккинчи ўн кунлигида “Насаф” футболчилари мавсумдаги жиддий учрашувлардан бирини ўтказишади.

“Навбаҳор”га қарши кечган баҳсдан сўнг футболчилар қисқа муддатли таътилга йўл олишганди. 7 сентябрдан бошлаб жамоа аъзолари клуб қароргоҳида тўпланишди ва кейинги учрашувга ҳозирликни бошлаб юборишган. Хабарингиз бор,  жамоанинг тўрт нафар аъзолари - Владимир Шишелов, Шоҳруҳ Гадоев, Фозил Мусаев ва Мурод Зуҳуровлар терма жамоамизнинг ЖЧ-2014 саралаш босқичи доирасидаги Жанубий Кореяга қарши учрашуви олдидан ташкил этилган йиғинга жалб қилинишган. 7 сентябр куни терма жамоамизнинг Кувайтга қарши ўтказилган ўртоқлик учрашувида Мусаев, Гадоев ва Шишелов терма жамоа сафида ҳаракат қилишди. Эътиборли томони, Шоҳруҳ Гадоев илк марта терма жамоа сафида 90 дақиқа ҳаракат қилган бўлса, ҳужумчи Владимир Шишелов беш йиллик танаффусдан кейин яна мамлакат бош жамоаси либосида майдонга тушди.

Эслатиб ўтамиз, 19-турдан ўрин олган “Насаф” – “Шўртан” учрашуви 14 сентябрь, жума куни соат 18:30да Қарши шаҳридаги “Марказий” стадионда бошланади.