Ўзбекистон ўсмирлар терма жамоаси 22 сентябрь – 6 октябрь кунлари Эронда ташкил этиладиган Осиё чемпионатида иштирок этади. Терма жамоа олдига Жаҳон чемпионатига чиқиш вазифаси қўйилган.

Ўзбекистон ўсмирлар терма жамоаси Осиёнинг амалдаги вице-чемпиони ҳисобланади. 2010 йили Ўзбекистонда ташкил этилган ўсмирлар ўртасидаги Осиё чемпионатида Алексей Евстафеев қўл остидаги ўзбекистонлик ўсмирлар мусобақанинг финал учрашувига қадар етиб боришган эди. Қайд этиш жоиз, Дилшод Нуралиев қўл остидаги, 1996 йилда туғилган футболчилардан ташкил топган Ўзбекистон ўсмирлар терма жамоаси ҳам ўз олдига мана шундай юқори мақсадни қўйган.

Ўзбекистон ўсмирлар терма жамоаси сентябрнинг дастлабки 10 кунлигида Тошкент вилоятининг Дукент шаҳарчасида йиғин ўтказди. Йиғин давомида «Пахтакор» ва «Локомотив» клубларинг ёшлар жамоаларига қарши назорат учрашувлари ўтказилди. Ҳар иккала ўйин ҳам ўсмирлар терма жамоасининг ишончли ҳисоблардаги ғалабаси билан якунига етди (мос равишда – 2:0 ва 3:0). Ушбу йиғин Дилшод Нуралиевга Осиё чемпионатига йўл оладиган таркибни аниқлаб олиш имконини берди. Бош мураббийнинг сўзларига кўра, якуний таркибда ҳозирги 24 футболчидан иборат рўйхатдан бир кишига камаяди.

Ўзбекистон ўсмирлар терма жамоаси 19 сентябрь куни яна Тошкентда йиғилади. 21 сентябрь куни эса Осиё чемпионати финал босқичида иштирок этиш учун Эронга жўнаб кетилади. Ўзбекистон мусобақанинг «D» гуруҳидан ўрин олган бўлиб, гуруҳда унга Сурия, Хитой ва Ҳиндистон терма жамоалари рақиблик қилади. Ўзбекистонлик ўсмирлар мусобақадаги илк учрашувларини 23 сентябрь куни Теҳрондаги «Роҳи Оҳан» стадионида Ҳиндистон терма жамоасига қарши ўтказишади.

«Бу ой Ўзбекистон ўсмирлар терма жамоаси учун жуда масъулиятли. Биз Дилшод Нуралиев қўл остидаги терма жамоани катта мақсадлар ва катта режалар билан Эронга кузатамиз. Биз уларга ишонамиз», - деди ЎФФ Терма жамоалар маркази директори Асқар Толибжонов 13 сентябрь куни бўлиб ўтган Мураббийлар кенгашида.

Осиё чемпионатида иштирок этиши мумкин бўлган Ўзбекистон ўсмирлар терма жамоаси аъзолари