“Олмалиқ” – “Бунёдкор” учрашувидан кейинги матбуот анжуманининг биринчи қисмида мезбонлар устози иштирок этди.

- Рақибни яхши ўрганиб чиққанимиз ва ўйинга мос тактика танлаганимиз бизга қўл келди. Амалдаги чемпион устидан қозонилган ғалабадан хурсандман. Бироқ бу – ҳамма ишларимиз ва ўйин услубимиз жойида дегани эмас! Ҳали ишлашимиз лозим бўлган жиҳатлар бор. “Олмалиқ” – ёш жамоа. Шу боисдан ҳам бу футболчилар билан ишлашдан тўхтамаслигимиз керак. Пешқадамлар устидан қозониладиган ғалабалар ҳар қандай футбол мухлиси учун ёқимли. Аввалги турларда оддий ўйинларда ҳам кўп очколар йўқотгандик. Масалан, ўз майдонимизда “Бухоро”га ютқазиб қўйишимизни ҳеч ким кутмаганди. Кейин бошқа ўйинларда мағлуб бўлдик. Ўша ўйинлар зарарини бугун қоплаб олдик, - деди Игорь Анатолиевич.

- Пешқадамларга қарши ҳар бир жамоа “тиш қайриб” майдонга чиқишади. Бугун ҳам шундай ўйин гувоҳи бўлдик. Бу каби ўйинларда футболчилар алоҳида тайёрланадими ёки учрашувнинг ўзи шунга мажбур қиладими?
- “Бунёдкор”, “Пахтакор” ва “Насаф” сингари клубларга қарши футболчиларга алоҳида кўрсатма беришнинг ҳожати йўқ. Ҳар доим ҳам бундай рақиблар билан ўйинлар бўлавермагани боис футболчиларнинг иштиёқи ўз-ўзидан пайдо бўлади. Буни ўзим ҳам футболчилик пайтимда бошимдан ўтказганман.