Суперлиганинг 4-турида "Бунёдкор" ўз майдонида "Турон" жамоасини қабул қилди ва учрашувда ҳисоб очилмади. Ўйиндан сўнг меҳмонлар бош мураббийи Бахтиёр Ашурматов учрашув ҳақида фикрлари билан ўртоқлашди.
"Бунёдкор" 9 очко жамғарган бўлишига қарамасдан, бугун майдонда яққол фаворит жамоа йўқ эди. Ҳар икки жамоа ҳам ўзининг яхши томонларини кўрсатишди. Биринчи бўлимда биз кўпроқ вазиятлар яратдик ва тўпни кўпроқ назорат қилдик. Иккинчи бўлимда эса "Бунёдкор" биздан кўра фаолроқ ҳаракат қилди. Ўйиннинг охирги дақиқасидаги вазиятни ҳисобга олмаганда, вазият яратилмади десак ҳам бўлади.
Ҳимоямиз биринчи бўлимда 1-2 та хатоларга йўл қўйди, лекин иккинчи бўлимда ўз ўйинимизни топиб олдик. Умуман олганда, ҳимоячиларимиз ёмон ўйнашмади. Рақибга вазият яратгани имконият бермадик. Ҳар бир киритилган очко жамоамизнинг фойдасига ишлайди.
Энг асосийси йигитлар сўнгги учта ўйиндан тушкунликдан кейин бугунги ўйинда ўзларига бўлган ишонч билан ўйнашди. Тўғрисини айтганда, биз ғалабани мўлжаллагандик, лекин "Бунёдкор"нинг сўнгги дақиқадаги вазиятини ҳисобга оладиган бўлсак, дуранг адолатли натижа бўлди" - деди Ашурматов.
