Superliganing 4-turida "Bunyodkor" o‘z maydonida "Turon" jamoasini qabul qildi va uchrashuvda hisob ochilmadi. O‘yindan so‘ng mehmonlar bosh murabbiyi Baxtiyor Ashurmatov uchrashuv haqida fikrlari bilan o‘rtoqlashdi.

"Bunyodkor" 9 ochko jamg‘argan bo‘lishiga qaramasdan, bugun maydonda yaqqol favorit jamoa yo‘q edi. Har ikki jamoa ham o‘zining yaxshi tomonlarini ko‘rsatishdi. Birinchi bo‘limda biz ko‘proq vaziyatlar yaratdik va to‘pni ko‘proq nazorat qildik. Ikkinchi bo‘limda esa "Bunyodkor" bizdan ko‘ra faolroq harakat qildi. O‘yinning oxirgi daqiqasidagi vaziyatni hisobga olmaganda, vaziyat yaratilmadi desak ham bo‘ladi.

Himoyamiz birinchi bo‘limda 1-2 ta xatolarga yo‘l qo‘ydi, lekin ikkinchi bo‘limda o‘z o‘yinimizni topib oldik. Umuman olganda, himoyachilarimiz yomon o‘ynashmadi. Raqibga vaziyat yaratgani imkoniyat bermadik. Har bir kiritilgan ochko jamoamizning foydasiga ishlaydi.

Eng asosiysi yigitlar so‘nggi uchta o‘yindan tushkunlikdan keyin bugungi o‘yinda o‘zlariga bo‘lgan ishonch bilan o‘ynashdi. To‘g‘risini aytganda, biz g‘alabani mo‘ljallagandik, lekin "Bunyodkor"ning so‘nggi daqiqadagi vaziyatini hisobga oladigan bo‘lsak, durang adolatli natija bo‘ldi" - dedi Ashurmatov.