Суперлиганинг 4-тури доирасида сафарда “Металлург”ни мағлуб этган амалдаги чемпион – “Пахтакор” клуби устози Максим Шацких ғалаба ҳақли тарзда қўлга киритилгани, Аъзамов ва Рашидовнинг ҳолати ва терма жамоа йиғинларидан сўнг жамоага қайтган футболчилар ҳолати бўйича фикр билдирди.
"Учрашувда ҳақли ғалабага эришдик. Гол уриш учун етарли имкониятлар яратмаган бўлишимиз мумкин, аммо, умумий қилиб айтадиган бўлсам, ғалабага биз тўла ҳақли эдик. Майдон сифати бизга ўзимиз хоҳлаган футболни намойиш этишга ҳалал берган бўлса ҳам, умуман олганда ёмон ўйнамадик. Ғалабага ҳақли равишда эришдик”, - деди мураббий.
“Рашидов ҳақидаги саволларга олдинги ўйинлардан кейинги матбуот анжуманларида батафсил жавоб берган эдим. Ҳозир ҳам қайтаришим мумкин – унинг формаси ҳозирча биз кутган даражада эмас. У ҳозирда машғулотларда астойдил шуғулланяпти ва умид қиламанки, жамоага кучлироқ, биз билган Рашидов қайтади. Бизда асосий таркиб деган тушунча ё‘қ. Биз барчага бирдек имконият бераяпмиз. А’замов эса, биринчи давра якунига қадар жамоамизга қўшилишига умид қиламиз. Унинг жароҳати бироз жиддий эди ва мутахассислар уни биринчи давра якунигача сафга қайтишини айтишган эди. Бу борада таваккал қилишни истамаймиз. Унга шифокорлар қачон рухсат беришса, шунда қайтади. Режа бўйича тикланиш жараёнларини олиб борса, биринчи давра якунигача сафимизга қайтади”.
“Албатта, “Пахтакор”дан турли ёшдаги термаларимизга қанча кўп футболчи чақирилса, бундан хурсанд бўламиз. Асосий терма жамоада ҳам, U-20 термасида ҳам бизнинг жуда кўплаб футболчиларимиз бор. Бу бизнинг ҳам ютуғимиз. Аммо, мураббий сифатида улар бизнинг ёнимизда, менинг ёнимда бўлишса, хотиржамроқ бўламан. Мана, ҳозир ҳам уларнинг йиғинлардан сўнг жамоамизга киришиб кетиши бироз қийинроқ жараённи ташкил қилади. Бу табиий. Уларга ортиқча юкламалар тушади. Бу борада мураббийлар ишлаймиз. Вазифамиз – футболчилар билан юзага келадиган бу каби муаммоларни минималлаштириш. Аммо, яна қайтараман, ҳар қандай футболчининг мақсади – миллий терма жамоа сафида ўйнаш. Биздан чақирилаётган футболчилар қанча кўпчилик бўлишса, шунча хурсанд бўламиз”.
