"Андижон" клуби ёшлари мусобақа пешқадами "Пахтакорни мағлуб этганларидан кейин (3:1), жамоа бош мураббийи Нозим Муллаохунов ўйин ҳақидаги фикрлари билан ўртоқлашди:

— Биз учун орқага йўл йўқ эди. Бизнинг ишимиз фақат «Пахтакор»га ўхшаган лидер жамоаларни «қувлаш»дан иборат. Бу беллашувда ҳаммаси футболчиларимизнинг ўзларига боғлиқ эди.

Эътибор бераётган бўлсангиз, ҳар ўйинда таркибимиз алмашмоқда. Бу билан бир хил даражада ўйин кўрсатиш осон бўлмайди. Мисол учун бугунги учрашувда ҳимоячи Азиз Қаюмов ва ярим ҳимоячи Акбар Ходжаев жамоамизга ёрдам бера олмадилар. Лекин Шаҳбоз Жумабоевнинг яна спорт формасини тиккалаётганидан хурсандман. У бир йил мобайнида жароҳат олиб ўйнай олмаётганди. Бугун эса Шаҳбоз ўзидан илиқ таассурот қолдирди. Унинг учун хурсанд бўлдим.

Умуман олганда, тактик жиҳатдан «Пахтакор» барибир кучли. Бизда ғалаба учун интилиш ва иштиёқ кўпроқ бўлганлиги учун муваффақиятга эришдик.