Давралар оралиғида "Локомотив" жамоасига келиб қўшилган тажрибали футболчи Акмал Холматов "Металлург" билан бўлган ўйиннинг 58-дақиқасида рақиб дарвозасини ишғол қилди. Бу билан у темирйўлчилар сафида ўз голлари ҳисобини очиш билан бирга ўз номини футболимиз тарихига муҳрлади. Гап шундаки, ушбу тўп Холматовнинг Ўзбекистонда асос солинган 100лик клубига аъзо бўлишини таъминлади.

Хабарингиз бор, 100лик клубида футболчининг Ўзбекистон миллий терма жамоаси, Осиё кубоклари (ОЧЛ ва ОФК кубоги), Ўзбекистон чемпионати ва кубогида киритилган голлари ҳисобланади. Ўртоқлик учрашувлари ва халқаро турнирларда киритилган голлар бу рўйхатга киритилмайди. Холматов Осиё кубоклари, ички чемпионат ва кубок мусобақаларида шу кунгача 99та гол урган эди. "Металлург" дарвозасига урилган гол жамоамиз аъзосини ниҳоят 100лик клуби аъзосига айлантирди. Холматовнинг 100лик клубига аъзо бўлиш йўлида урилган голлари статистикасини эътиборингизга ҳавола қиламиз.

Осиё кубокларида (ОЧК ва ОЧЛ) – 7та,
Ўзбекистон чемпионатларида – 73,
Ўзбекистон кубогида – 20.