Австралиянинг «Ньюкасл Юнайтед Жетс» клуби Эмил Ҳески билан шартнома имзолаганлигини эълон қилди. Собиқ Англия терма жамоаси ҳужумчиси ўтган мавсумни «Астон Вилла» таркибида ўтказганидан сўнг А лигага эркин агент сифатида ташриф буюрди.

«Бу ерга келишим ҳаётимдаги ажойиб давр бўлди. Мен А лигани ривожлантиришга, айниқса, «Ньюкасл Юнайтед Жетс»нинг ғалабали ўйинларига ўз ҳиссамни қўшаман деб ўйлайман», дея ўз фикрида давом этди Эмил Ҳески, «Ўйлайманки, бу ерда футболни янада ривожланишига кўмаклашаман ва «Жетс»нинг ёш футболчиларига керакли маслаҳатларни бера оламан. Мавсум бошланишига кўп вақт қолгани йўқ, шу сабабли мен тезроқ клубга бориб қўшилишим ва жамоадошларим билан бирга машғулотларда қатнашишим, 7 октабрдаги ўйинга тайёрланишим керак».

«Жетс»нинг бош директори Робби Мидлиби собиқ «Ливерпул», «Уиган», «Лестер Сити» ўйинчисини Австралияга олиб келиниши ажойиб иш бўлганлигини таъкидлади:
«Эмил Ҳескини олиб келингани А лига учун ҳам, «Жетс» учун фантастик иш бўлди. Эмил Англияда юқори даражада фаолият олиб борган футболчи, у халқаро майдонда ҳам ўз обрўсига эга. Ўтган мавсумни ҳам «Астон Вилла» таркибида Англия Премьер лигасида ўтказди. Эмилда бошқа клубларга ўтиш варианти борлигини ҳам эшитгандик. Шундай бўлса-да, футболчини ўз таркибимизда кўриб турганимиздан хурсандмиз. Эмил бизнинг лигада ўйнашга қизиқиш билдирди. Алоқаларни йўлга қўйишда Эмил Ҳескининг Премьер Лиганинг собиқ ўйинчилари бўлган Майкл Брижс ва Робби Фоулер билан муносабати сабабчи бўлди».