Суперлиганинг 6-тури доирасида ўз майдонида “Турон”га қарши ўйинда 1:1 ҳисобида дуранг ўйнаган “Нефтчи” клуби устози Виталий Левченко принципиаллик, ўйин давомидаги чарчоқ ва жисмоний ҳолат, алмаштиришлар ва клубнинг молиявий аҳволи бўйича саволларга жавоб берди.

“Ғалабани ушлаб қолишни истагандик, аммо, бунинг уддасидан чиқа олмадик. Икки қўшни жамоалар майдонга тушишди ва бу иккала жамоа учун ҳам принципиал баҳс эди. Дурангни режа қилмаган эдик. Жамоага бироз совуққонлик етишмади”, - дейди Левченко.

Сўнгги ўйинлардаги хатолар чарчоқ билан боғлиқ деб ўйлайман. Футболчиларда жисмоний жиҳатдан чарчоқ сезилаяпти. Бу борада ишлаймиз албатта.

Биз ўйин давомида тактик жиҳатдан ўзгариш қилиш ва схемамизни 5-4-1га алмаштиришга ҳаракат қилдик, алмаштиришлар ҳам шу билан боғлиқ. Аммо, бунинг уддасидан чиқа олмадик, куч етмади. Рақиб эса, ҳисобни тенглаштиришга уринди ва буни уддалади. Кимдир натижани ушлаб қолишни истади, кимдир эса гол уришни. Якунда эса дуранг қайд этилди.

Клубдаги молиявий аҳвол бу клубнинг ички иши. Бу нарсалар ҳақида гапиришни истамайман. Натижаларни молиявий аҳвол билан боғламаган бўлардим. Клуб кўрсатаётган натижалар бу машғулотлар ва тайёргарлик маҳсулидир” - дея қўшимча қилди Левченко.