"Бавария" бугун ЕЧЛнинг чорак-финалидан ўрин олган ўйинда "Манчестер Сити"ни ўз майдонида қабул қилади. Бу жуфтликнинг биринчи ўйиндаги натижаси ҳаммага маълум. Шу сабабли, бугунги мезбонлар учта гол фарқини йўққа чиқаришга уриниб кўришлари керак. Агарда "Etihad"даги 3-0 йўққа чиқарилмаса, кўпчиликда турли хил саволлар юзага кела бошлайди. Шулардан бири, "Бавария" раҳбариятининг нега мавсумни ўртасида, ҳеч қандай сабабларсиз Юлиен Нагельсманни ишдан олиб, ўрнига Томас Тухелни олиб келганидир. Мюнхенликлар шундай аҳволда турган бир пайтда, уларнинг рақиби – "Манчестер Сити"! Бу жамоа ҳозирга қадар йўлида учраган клубни яксон қилиб ўтмоқда. Гвардиола жорий мавсумда ЕЧЛ ва АПЛ чемпионлигини кўзлаган. Қуйида "Бавария"нинг "шаҳарликлар"га қарши жавоб учрашувига оид айрим маълумотларга эга бўласиз.
Баҳс қаерда ўтказилади?
Жой: Мюнхен, Германия
Ўйингоҳ: Allianz Arena
Вақт: 19 апрель, чоршанба
Старт: 20:00 маҳаллий вақт билан, 00:00 Тошкент вақти билан
Ҳакам: Клеман Тюрпен (Франция)
ВАР: Жером Брисар (Франция)
Ўзаро ўйинлар
"Бавария"да 2 та ғалаба
"Манчестер Сити"да 3 та ғалаба
Дуранг: 0 та
Умумий 5 та.
Жамоалар ҳолати (сўнгги 5 та ўйинда)
"Бавария" – 2 та мағлубият, 2 та ғалаба, 1 та дуранг
"Манчестер Сити" – 5 та ғалаба
"Бавария" ҳақида
Садио Мане битта ўйинлик четлатишдан кейин майдонга тушиши мумкин. Бу тақиқ унга ўз жамоадоши Лерой Санени юзига урганидан кейин берилган эди. Аммо сенегаллик ҳужумчи майдонга тушадими ёки йўқ, бу бошқа масала. Томас Тухель ҳужумда янги қуролга эга бўлади. Қайд этилишича, Эрик Шупо-Мотинг машғулотларга қайтган. 34 ёшли ҳужумчи душанба куни жамоа билан бирга эди. У "Бавария"нинг учта тўплик эҳтиёжини қондиришда ёрдам бериши мумкин бўлади. Дарвозабон Мануэль Нойер ва ҳимоячи Лукас Эрнандес эса ҳали ҳам жароҳатда.
Жамоанинг тахминий таркиби
Дарвозада: Янн Зоммер;
Ҳимояда: Павар, Упамекано, Де Лигт, Девис;
Таянчда: Киммих Горецка;
Ярим ҳимояда: Коман, Мусиала, Сане;
Ҳужумда: Шупо-Мотинг (4-2-3-1)
"Манчестер Сити" ҳақида
Фил Фоден жамоанинг ягона лазарятдаги футболчиси бўлиб қолмоқда. Ҳужумчи кўричагини олдириб ташлаган эди. Сўнгги хабарларда Фоден ҳам машғулотларга қайтгани айтилади. "Лестер" билан АПЛ ўйинида ҳисоб-китоб тугагач, Холанд ва Родри эртароқ захирага олинганди. Бу орқали Гвардиола уларни бугунги ўйин учун сақлаб қўйган.
Жамоанинг тахминий таркиби
Дарвозада: Эдерсон;
Ҳимояда: Аканжи, Диас, Аке;
Таянчда: Стоунз, Родри;
Ярим ҳимояда: Силва, Гюндоган, Де Брюйне, Грилиш;
Ҳужумда: Холанд (3-2-4-1)
"Бавария" одатда ўз уйида жуда яхши ўйнайди ва ўзига керакли натижани қайд эта олади. Қолаверса, сўнгги ўйинларда "Сити" ҳимояси оқсамоқда. Аммо немис клубнинг бугунги вазифаси улар учун ортиқчалик қилади. Ҳисоб буни кўрсатмаётган бўлсада, бу жуфтликда ҳали интрига сақланиб турибди. Ҳаммаси майдонда ҳал этилади.
Эслатиб ўтамиз, "Бавария" ва "Манчестер Сити" баҳсини бугун 00:50 дан бошлаб SPORT TV телеканалида тўғридан-тўғри эфирда томоша қилишингиз мумкин.
ИСМАТОВ Ж.
