"Bavariya" bugun YECHLning chorak-finalidan o‘rin olgan o‘yinda "Manchester Siti"ni o‘z maydonida qabul qiladi. Bu juftlikning birinchi o‘yindagi natijasi hammaga ma’lum. Shu sababli, bugungi mezbonlar uchta gol farqini yo‘qqa chiqarishga urinib ko‘rishlari kerak. Agarda "Etihad"dagi 3-0 yo‘qqa chiqarilmasa, ko‘pchilikda turli xil savollar yuzaga kela boshlaydi. Shulardan biri, "Bavariya" rahbariyatining nega mavsumni o‘rtasida, hech qanday sabablarsiz Yuliyen Nagelsmanni ishdan olib, o‘rniga Tomas Tuxelni olib kelganidir. Myunxenliklar shunday ahvolda turgan bir paytda, ularning raqibi – "Manchester Siti"! Bu jamoa hozirga qadar yo‘lida uchragan klubni yakson qilib o‘tmoqda. Gvardiola joriy mavsumda YECHL va APL chempionligini ko‘zlagan. Quyida "Bavariya"ning "shaharliklar"ga qarshi javob uchrashuviga oid ayrim ma’lumotlarga ega bo‘lasiz.
Bahs qayerda o‘tkaziladi?
Joy: Myunxen, Germaniya
O‘yingoh: Allianz Arena
Vaqt: 19 aprel, chorshanba
Start: 20:00 mahalliy vaqt bilan, 00:00 Toshkent vaqti bilan
Hakam: Kleman Tyurpen (Fransiya)
VAR: Jerom Brisar (Fransiya)
O‘zaro o‘yinlar
"Bavariya"da 2 ta g‘alaba
"Manchester Siti"da 3 ta g‘alaba
Durang: 0 ta
Umumiy 5 ta.
Jamoalar holati (so‘nggi 5 ta o‘yinda)
"Bavariya" – 2 ta mag‘lubiyat, 2 ta g‘alaba, 1 ta durang
"Manchester Siti" – 5 ta g‘alaba
"Bavariya" haqida
Sadio Mane bitta o‘yinlik chetlatishdan keyin maydonga tushishi mumkin. Bu taqiq unga o‘z jamoadoshi Leroy Saneni yuziga urganidan keyin berilgan edi. Ammo senegallik hujumchi maydonga tushadimi yoki yo‘q, bu boshqa masala. Tomas Tuxel hujumda yangi qurolga ega bo‘ladi. Qayd etilishicha, Erik Shupo-Moting mashg‘ulotlarga qaytgan. 34 yoshli hujumchi dushanba kuni jamoa bilan birga edi. U "Bavariya"ning uchta to‘plik ehtiyojini qondirishda yordam berishi mumkin bo‘ladi. Darvozabon Manuel Noyer va himoyachi Lukas Ernandes esa hali ham jarohatda.
Jamoaning taxminiy tarkibi
Darvozada: Yann Zommer;
Himoyada: Pavar, Upamekano, De Ligt, Devis;
Tayanchda: Kimmix Goreska;
Yarim himoyada: Koman, Musiala, Sane;
Hujumda: Shupo-Moting (4-2-3-1)
"Manchester Siti" haqida
Fil Foden jamoaning yagona lazaryatdagi futbolchisi bo‘lib qolmoqda. Hujumchi ko‘richagini oldirib tashlagan edi. So‘nggi xabarlarda Foden ham mashg‘ulotlarga qaytgani aytiladi. "Lester" bilan APL o‘yinida hisob-kitob tugagach, Xoland va Rodri ertaroq zaxiraga olingandi. Bu orqali Gvardiola ularni bugungi o‘yin uchun saqlab qo‘ygan.
Jamoaning taxminiy tarkibi
Darvozada: Ederson;
Himoyada: Akanji, Dias, Ake;
Tayanchda: Stounz, Rodri;
Yarim himoyada: Silva, Gyundogan, De Bryuyne, Grilish;
Hujumda: Xoland (3-2-4-1)
"Bavariya" odatda o‘z uyida juda yaxshi o‘ynaydi va o‘ziga kerakli natijani qayd eta oladi. Qolaversa, so‘nggi o‘yinlarda "Siti" himoyasi oqsamoqda. Ammo nemis klubning bugungi vazifasi ular uchun ortiqchalik qiladi. Hisob buni ko‘rsatmayotgan bo‘lsada, bu juftlikda hali intriga saqlanib turibdi. Hammasi maydonda hal etiladi.
Eslatib o‘tamiz, "Bavariya" va "Manchester Siti" bahsini bugun 00:50 dan boshlab SPORT TV telekanalida to‘g‘ridan-to‘g‘ri efirda tomosha qilishingiz mumkin.
ISMATOV J.
