Суперлига 7-туридан ўрин олган “Насаф” – “Олимпик” (3:0) учрашувидан сўнг меҳмонлар бош мураббийи Тимур Кападзе ўз фикрларини билдириб ўтди.

“Насаф”га қарши беллашув осон бўлмаслигини билар эдик. Барчаси режа бўйича кетаётган эди. Тайм сўнггида стандарта вазиятдан гол ўтказиб юбордик ва барчаси ўзгариб кетди. Учрашувдан олдин Алиқулов энг хавфли рақиб эканлигини таъкидлаган эдим. Хатолардан тўғри хулоса чиқаришга ҳаракат қиламиз.

Баҳсдан олдин Жалолиддинов ва яна 7-8 нафар футболчимизда шамоллаш аломатлари бор эди. Айримларнинг тана ҳарорати ҳам юқори эди. Шу сабабли Жасурни захирага олишга қарор қилдим.

7 учрашувда 9 та тўп ўтказиб юбордик, биз стандарт вазиятлар устида ишлашимиз керак. Бугун барча голлар ҳам айнан жарима зарбаларидан киритилди. “Насаф” деярли барча учрашувларда шундай гол киритмоқда.

“Пахтакор” билан баҳсдан сўнг “Олимпик”да пасайиш бўлдими? “Пахтакор”ниннг ёшларига қарши беллашувда 3 та қизил карточка олдик. Кейин “Сўғдиёна” билан учрашувда ҳам четлатиш рўй берди. Бизни шу жиҳат қийнади. Мавсум ҳали олдинда, бизнинг вазифамиз бошқа, Суперлига биз учун тайёргарлик вазифасини ўтайди. Ўйлайманки, мавсум охирида юқори ўринда бўламиз”, – деди Кападзе.