Суперлига 7-турида ўз майдонида “Металлург”ни йирик ҳисобда ютган “Андижон” клуби устози Александр Хомяков ғалаба сири, тактика, Андижондаги стадион қачон тайёр бўлиши ва рақиб ҳақидаги саволларга жавоб берди.

“Бугунги ғалабанинг асосий факторларидан бири тўғри тактика танлаганимиз бўлди дейиш мумкин. Рақибнинг хатоларидан фойдалана олдик. Асосий урғу дастлабки 10 дақиқаликка қаратилган эди. Бундан унумли фойдалана олдик. Голдан кейин ўйинни тўлиқ назорат қилдик, дейиш мумкин. Ғалабани эса, андижонлик мухлисларга бағишлайман”, - деди Хомяков.

“Албатта, ҳар бир ўйинда фақатгина ғалаба учун майдонга тушамиз. Мураббий сифатида шуни истайман, шунга ҳаракат қиламан, бу осон эмас, аммо уддалайдиган вазифа”.

“Очиғи, клубимиз қачон ўз уй стадионида ўйнаши ҳақида ҳеч нима билмайман. Андижондаги стадион май ойи охирларида битади дейишган эди. Рости, билмайман. Албатта, биз ҳам тезроқ ўйинларимизни уйимизда ўтказишни истаймиз. Раҳбарият бу борада ишлаяпти”.

“Металлург”нинг аввалги ўйинларини кўрдим ва айтишим мумкинки, жамоа тўпни назорат қиладиган, кучли ижрочиларга эга ва даражаси юқори бўлган жамоа. Бу жамоа ҳали кўпчиликни қийнайди”.