Захирадан майдонга тушган Хитой ўсмирлар терма жамоаси футболчиси Чэн Веймин ҳакам томонидан ўйинга қўшиб берилган 4 дақиқанинг учинчисида жарима майдончаси ичида ҳиндистонлик Ален Деорини чалиб йиқитди ва иорданиялик ҳакам Носир ал-Ғаффорий пенальти белгилади. Натижада Хитой ўсмирлар қитъа чемпионатини эрта якунлашга мажбур бўлишди.

"Бундай аҳволда чорак финалга чиқа олмаганимиздан нафақат менинг, балки бутун жамоанинг хафсаласи пир бўлди. Биз мусобақа давомида мағлубиятга учрамадик, зўр ўйнадик, аммо қандайдир сониялар бизни барча нарсадан маҳрум қилди", дейди Хитой ўсмирлар терма жамоаси бош мураббийи Су Маожен.

"Мен ҳеч қачон ҳакамни танқид қилмаганман ва ҳозир ҳам танқид қилмайман. Лекин мен кўрган вазиятда қоида бузилмаганди. Ушбу мусобақадан олган фойдамиз шу бўлдики, ўйинчилар катта тажриба тўплашди ва бундан кейин мана шундай катта руҳий босим остида ўйнаётганларида нима қилиш кераклигини энди яхши билишади", дейди у.

"Биз бугунги ўйинни яхши бошладик. Афсуски, гол ўтказиб юбордик. Шунга қарамай, голлар уриб ҳисобда олдинга чиқиб олдик. Бу натижа бизни чорак финалга олиб чиқиши керак эди. Аммо футбол баъзида ҳаддан ташқари шафқатсиз бўлади. Биргина вазият бизнинг бир йиллик тайёргарлигимизни йўққа чиқарди", дейди Су Маожен.