“Насаф” – “Машъал” (3:0) учрашуви якунлангандан сўнг ташкил этилган матбуот анжуманида дастлаб меҳмонлар катта мураббийи Александр ХОМЯКОВ иштирок этди.
А.Хомьяков: -Аввало “Насаф”ни ғалаба билан табриклайман. Биз бугунги “дерби”га яхши тайёргарлик кўргандик. Аммо уларга қарши ишланган тактика бугун иш бермади. Шунинг учун керакли натижани қўлга кирита олмадик. Шогирдларим ишончни оқлай олишмади.
-Сизнинг қўл остингизда жамоа “Пахтакор” билан ўйнаганди. Бугун эса “Насаф”га қарши ўйнадинглар. Ҳар иккала жамоани таққослаганда, қайси бири кучлироқ?
- Иккала рақиб ҳам анча тажрибали жамоа ҳисобланади. Бу жамоаларни қай бири кучлилигини аниқ айтиш қийин.
-Жамоага иштиёқ етишмаётгандек туюлмоқда...
- Мен бу фикризга қўшилмайман. Жамоа ҳаракат қилмоқда, аммо негадир ижобий натижаларга эришолмаяпмиз. Бунинг аниқ сабабини айтиш қийин. Биз учун ҳар бир ўйин финал билан тенгдек.
-Бош мураббийнинг йўқлиги жамоанинг натижаларига таъсир кўрсатяптими?
- Бош мураббийимизнинг йўқлиги сезилмоқда. Менга тажриба йўқлиги панд бермоқда.
-Соломин, Мандзукас, Ресанович каби футболчилар жамоани кучайтира олишдими?
- Менимча, бу футболчиларнинг таркибимизга қўшилгани бизга наф бермоқда. Соломин ўтган баҳсда иккита тўп киритиб муҳим ғалабамизни таъминлади. Мандзукас ҳам ишончни оқламоқда. Ресанович ҳақида ҳозирча бир тайинли гап айтиш қийин.
-Бугун “Машъал” қарши ҳужумда ҳаракат қилди. Бу сизнинг бугунги ўйинга танлаган услубингизмиди?
-Бугунги рақибимиз бизни ҳимоядан ўйнашга мажбур этди. Учрашувдаги устунликни “Насаф”га бериб қўйдик.
