Муваффақиятни ҳис қилишда «тайминг» жуда муҳим фактор.

Қаранг, «Арсенал» икки йилдан буён олдинги ўз даври учун энг яхши мавсумини ўтказмоқда, аммо мавсум сўнггидаги ҳиссиёт салбий. Жамоага омадсиз мақоми берилиб, мавсум бўйи «Арсенал» натижаларига яқин келмаган бошқа жамоалар мухлислари томонидан кулги остига олинишиям турган гап.

Ўтган йили жамоа сўнгги беш йилда илк маротаба ЕЧЛ ўринларидан бири учун яқин келди. Сўнгги турларгача тўртликда юрди ҳам. Аввалги йиллар ўлчовида олдинги ташланган қадам, муваффақиятли деб баҳоланиши, умид бериши керак.

Бу сафар «Арсенал» ҳатто ҳозир ҳам 1-ўринда турибди. Чемпионлар Лигаси йўлланмаси эса, Арсен Венгер давридан бери илк маротаба нақд. Лекин ҳиссиёт тескари, жамоа оғзидаги ошни олдириб қўйган омадсиздек.

Шунчаки, «Арсенал»нинг пасайиши мавсум бошида эмас, охирига тўғри келгани холос сабаб. Умумий олганда, Артета шогирдлари ажойиб мавсум ўтказишмоқда, кўп жабҳаларда лигада етакчи, агар ўзаро ўйинларни (бу ҳам савол, агар қиролича ўлиб қолмаганда ва дастлабки ўзаро ўйин ўз вақтида, кузда ўтганида, «Арсенал» кучли давр эди) инобатга олмаса, «Сити»дан яхшироқ ўйнади ҳам. Манчестерликлар Ҳоландни, «Арсенал» эса «Манчестер Сити»дан Жезусни олгани ҳам фарқни кўрсатиб турибди.

Гвардиола ҳам «Арсенал»дан бундай курашни кутмаганки, бемалол ҳужумчисини сотган. Ўз бошидан баландроқ сакралгани аниқ. Футболчиларнинг АПЛда деярли (иккинчи) энг ёш таркибга экани, ниҳоят жамоа ўз ўйин чизгисига, мос мураббийига эга бўлгани, ёзда яна кучайиши мумкинлигини инобатга олсак, бу мавсум энг катта қадам ташланган давр бўлди, деб бемалол айтиш тўғри. Ҳа, чемпионлик учун бунчалик имконият бошқа келмаслиги мумкин, аммо кейинги узоқ йилларда «Арсенал» анча рақобатбардош кучга айлангани шубҳасиз.

Аслида, ўша гап, бу мавсум учун «Арсенал» мухлисларини табриклаш керак, аммо юпатиб ўтирганим қизиқ.

Қаҳрамон Асланов.