«Арсенал» клуби бош мураббийи Арсен Венгер заҳирадаги дарвозабон Вито Манноненинг мавсум якунига етганидан сўнг бошқа жамоага ўтиб кетишини маслаҳат берди.

Италиялик дарвозабон ўтган йилги мавсумни «Ҳал Сити» таркибида ижарада ўтказганди. Бу йил эса Манноне «Арсенал»нинг биринчи ва иккинчи рақамли дарвозабонлари Войцех Шесни ва Лукаш Фабианскининг жароҳатлари борлиги сабабли асосий таркибда ўйинга тушишга муваффақ бўлганди. Манноне тўрт ўйинда иккита гол ўтказиб юбориб, кўпчиликда анча илиқ таассурот қолдирди. Шунга қарамай, лондонликлар устози Венгер италиялик дарвозабонга кетишни маслаҳат берди.

«У доим ўзига ишонган ва яхши ўйнашини менга кўрсатишга ҳаракат қилган. Лекин асосий таркибда майдонга тушишда Маннонеда реал имконият йўқ. Шесни биринчи рақамли дарвозабон, бундан ташқари польшалик дарвозабондан кўпчилик мамнун. Ўтган йили Маннонени «Ҳал Сити»га юборганимдан сўнг ўйинларини кўрдим, яхши ўтказди. Уни ижарага бериб юбориб тўғри қилганимни айтдилар. Лекин ҳайронман, ҳеч қайси клуб бу дарвозабонни ўз таркибига қўшиб олиш истагини билдирмади».

«Дарвозабонлик мухим вазифа. Агар дарвозабон доимий равишда ўзгариб тураверса, яхши бўлолмайди. Агар Буффон бугун хато қиладиган бўлса, эртага яна «Ювентус» таркибида ўйнашини яхши билади. Агар Жо Харт хато қилса, у ҳам кейинги ўйинда «Манчестер Сит»да ўйнашини яхши билади. Лекин Маннонеда бундай имконият йўқ», дейди Арсен Венгер.