Ҳозиргина Испания олтинчи туридан ўрин олган «Севилья» ва «Барселона» ўртасида драматик тарзда бўлган учрашув ўз якунига етди. Ўйин кутилганидек каталонияликларнинг катта устунлиги остида ўтди. Лекин бу нарса ҳисобда ўз аксини топмади. Асосан, ҳимояда ва қарши ҳужумда ўйнаган «Севилья» вакиллари биринчи бўлиб гол уришга муваффақ бўлдилар. 26-дақиқада Троховски бунинг уддасидан чиқди.. Шундан сўнг «Барселона» тинмай ҳужум уюштирди, лекин биринчи бўлимда гол ура олмади.
Ўйин иккинчи бўлимда жуда ҳам қизғин тарзда кечди. Барчаси «Севилья» вакилларининг ҳисобни йириклаштиришлари билан бошланди. 48-дақиқада Негредо гол уришга муваффақ бўлди. Ҳисоб 2:0. Шундан сўнг каталонияликлар эса ҳужум қилишни канда қилмадилар, натижада, 53-дақиқада Фабрегас «Барселона» муҳлислари томонидан узоқ кутилган голни уриб ҳисобни қисқартирди.
72-дақиқага бориб эса, Медель асабларини жиловлай олмади ва Фабрегасга очиқчасига қўполлик ишлатди. Бу нарса футболчининг қизил карточка олиб майдондан четлатилишига сабаб бўлди. Медель шундоқ ҳам тинмай қилинаётган ҳужумларни 11 киши бўлиб зўрға қайтараётган жамоасини қийин аҳволга ташлаб кетди. Шундай бўлса-да, «Севилья» вакиллари 89-дақиқагача чидаб беришди, лекин қолган дақиқалар улар учун омадсиз кечди. 89-дақиқада яна катта саҳнага Фабрегас чиқди. Месси томонидан етказиб берилган тўпни рақиб дарвозасига жойлаб қўйди ва ўртадаги мувозанатни тиклади. Бу голдан сўнг ҳакам «Севилья» мураббийини ҳам ўйиндан четлатишга улгурди.
Айтиб ўтиш жоиз, гол бўлишидан бироз олдин «Барселона» футболчиси тўпни қўли билан ўйнаганди, ҳакам эса бунга эътибор бермади ва ўйинни тўхтатмади. Натижада қилинаётган ҳужум гол билан якунланди.
Қўшимча вақтда ҳам каталонияликлар ҳужумни сусайтиришмади ва 90+3 дақиқада Вилья «Барселона»га ғалаба келтирувчи голни уришга муваффақ бўлди. Ҳисоб 2:3. Бу сафар ҳам голли пасни Месси берган эди. «Севилья» вакиллари тайёр ғалабани ўйин охирида қўлдан чиқариб юбордилар. Каталонияликлар драматик тарзда кечган ушбу ўйинда қийинчилик билан ғалаба қозондилар. Шу куни мезбонлар «Реал» билан бўлган ўйиндай яхши ҳаракат қилишди. Улар дурангга муносиб эдилар. Лекин ҳакамнинг хатоси уларга қимматга тушди.
«Севилья»: Палоп, Сисиньо, Ботия, Спахич, Наварро, Медел, Ракитич(76, Кондогбиа), Мадуро,Навас, Троховски(38, Мораль), Негродо(81, Луна)
«Барселона»: Валдес, Д. Алвес(79, Вилья), Сонг, Маскерано,Х.Алба, С.Бускетс(76, Алькантара), Хави, Фабрегас, Педро, Месси, Санчес(70, Тельо)
Голлар: Троховски, 26 – 1:0, Негродо, 48 – 2:0, Фабрегас, 53 – 2:1, Фабрегас, 89 – 2:2, Вилья, 90+3 - 2:3.
Огоҳлантиришлар: Ракитич, 28, Ботия, 90+5 – Бускетс, 70, Педро, 75
Четлатиш: Медель, 72.
