Дортмунднинг "Боруссия" клуби "Манчестер Юнайтед" вингери Жейдон Санчога қизиқиш билдирмоқда, дея хабар бермоқда Bild нашри.

Манбага кўра, бундай келишув эҳтимоли жуда юқори. "Манчестер Юнайтед" раҳбарлари футболчига келаси йили у билан ҳисоблашмасликларини айтишган. Санчонинг ўзи тўрт мавсум тўп тепган Германия чемпионати клубига қайтишга қарши эмас. Бундан ташқари, "Боруссия" клуби спорт директори Себастьян Кель доимий равишда футболчи вакиллари билан мулоқот қилиб, немис клубининг 23 ёшли футболчига қизиқишини эслатиб турибди.

Дортмунднинг "Боруссия" клуби Санчони ижарага олмоқчи. "Манчестер Юнайтед" тўлақонли трансфер учун 55-60 миллион евро сўраши мумкин, аммо бу Германия чемпионати клуби учун жуда катта сумма, улар ҳали бу суммани тўлашга тайёр эмас.

Эслатиб ўтамиз, "қизил иблислар" вингерни Дортмунд клубидан 2021 йилнинг ёзида 85 миллион евро эвазига сотиб олганди.

Жорий мавсумда Санчо "манкунианликлар" сафида барча мусобақаларда 34 та ўйинда майдонга тушиб, 6 та гол ва 2 та голли узатмага муаллифлик қилган.

Футболчининг “Манчестер Юнайтед” билан шартномаси 2026 йилнинг июнь ойи охиригача амал қилади.