Хабарингиз бор, «Андижон» жамоаси 21-турда Фарғонада «Нефтчи» клубига 2:0 ҳисобида мағлубиятга учради. Ўша ўйинда тажрибали ҳужумчи Анвар Бердиевнинг иккита голи мезбонларнинг ғалабаси учун етарли бўлди.

Лекин унинг киритган иккинчи голи баҳс-мунозараларга сабаб бўлди. Негаки, ҳакамлар ўша вазиятда гол бўлганини бироз кеч пайқадилар. Бердиев эса бу ҳолатга қуйидагича фикр билдирди.

- «Гол биринчи вазиятда бўлган экан. Тўғриси, бошида билмагандим. Эътибор берган бўлсангиз, мен тўпни тепгач қараб турдим. Ўшанда гол деб югурганим ҳам йўқ. Тўп тўсинга тегиб чизиқнинг орқасига тегиб қайтгач қанот ҳаками марказ томон югурди. Биз эса унга эътибор бермасдан қайтган тўпни кимдир дарвозага киритади деб шунга аҳамият бериб қолдик.

Кейин эса бош ҳакам майдон марказини кўрсатганидан кейингина гол бўлганини билдик. Ўйиндан сўнг сўраб-суриштирсак, жарима тўпини тепганимда дарвоза чизиғини кесиб ўтган экан. Дарвоза ортида шуғулланаётган заҳирадаги жамоадошларимиз ҳам гол бўлганини айтдилар».