"ПСЖ" ҳужумчиси Лионель Месси жамоадошлари ва клуб ходимларидан узр сўради.
“Ассалому алайкум, мен бу видеони бўлган воқеалар учун тайёрладим. Аввало, жамоадошларим ва клубнинг барча ходимларидан узр сўрайман. Мен Саудия Арабистонига бу сафарни олдиндан белгилаган эдим ва уни бекор қила олмадим. Бошқа ҳеч нарса йўқ”, деди Месси ижтимоий тармоқлардаги видеода.
L'Equipe нашрининг ёзишича, Саудия Арабистонига режадан ташқари сафари учун икки ҳафтага дисквалификация қилинган Месси "ПСЖ"га қайтишдан маъно кўрмаяпти. Қайд этилишича, Месси "Парк де Пренс"да ўйнамоқчи эмас.
Жорий мавсумда аргентиналик футболчи парижликлар сафида 36 учрашувда 20 та гол урди ва 19 та голли узатмани амалга оширди. Унинг клуб билан шартномаси 2023 йилнинг 30 июнида якунига етади.
