Кеча Осиё чемпионлар лигасининг икки ярим финалчиси аниқланди. Унга кўра, Саудия Арабистонининг икки жамоаси ярим финалга чиқди ва улар ўзаро куч синашадиган бўлдилар.
"Ал-Иттиҳод" сафарда Хитойнинг "Гуанжоу Эвергранде" жамоаси билан куч синашди. Ўйиннинг 35-дақиқасига келиб, гуанжоуликлар 2:0 ҳисобида олдинга чиқиб олди. Биринчи ўйинда 4:2 ҳисоби қайд этилганини инобатга олсак, ушбу натижа хитойликларни қаноатлантирарди. Аммо 79-дақиқада Фаҳад Мусайд ал-Муваллад битта жавоб тўпини киритди ва жамоасини ярим финалга олиб чиқди.
"Ал-Аҳли" эса биринчи ўйинда Эрондан голсиз дуранг билан қайтганди. Ўйинннинг 27-дақиқасида "Сепоҳон" дарвозабони Ризо Муҳаммадий майдондан четлатилди. Шундан кейин ўйин фақат битта дарвоза олдида кечди, десак ҳам бўлади. Якуний ҳисоб - 4:1, "Ал-Аҳли" фойдасига.
ОЧЛ-2012. Чорак финал, жавоб учрашувлари
"ГУАНЖОУ ЭВЕРГРАНДЕ" (Хитой) - "АЛ-ИТТИҲОД" (Саудия Арабистони) - 2:1.
Биринчи ўйин - 2:4
"АЛ-АҲЛИ" (Саудия Арабистони) - "СЕПОҲОН" (Эрон) 4:1
Биринчи ўйин - 0:0
Бугун эса чорак финалнинг икки жавоб учрашувлари бўлиб ўтади. "Бунёдкор" "Аделаида Юнайтед"ни қабул қилса (биринчи ўйин 2:2), Саудиянинг яна бир клуби "Ал-Ҳилол" Кореянинг "Ульсан Хёндэ" клубини синовдан ўтказади (биринчи ўйинда кореяликлар 1:0 ҳисобида ғалаба қозонишган). Ушбу жуфтликлар ғолиблари ярим финалда тўқнаш келишади. Ярим финал ўйинлари 22 (24) ва 31 октябрь кунлари бўлиб ўтади.
