"Милан" бош мураббийи Стефано Пиоли эртага бўлиб ўтадиган "Интер"га қарши Чемпионлар лигасининг биринчи ярим финалида ҳужумчи Рафаэль Леау иштирок этишини истисно этмаяпти. Эслатиб ўтамиз, португалиялик футболчи А Сериянинг сўнгги турида "Лацио" билан ўйинда жароҳат олган ва шу сабаб ўйин бошида алмаштирилганди.
“Эртага биз Леаунинг ҳолатини баҳолаймиз ва унинг иштироки ҳақида қарор қабул қиламиз. Агар у ўзини тайёр ҳис қилмаса, захира ўриндиғига ҳам ўтирмайди. Биз футболчининг соғлиғини хавф остига қўйишдан маъно кўрмаяпмиз", - деди Пиоли ўйин олдидан ўтказилган матбуот анжуманида.
Леау "Милан"нинг жорий мавсумдаги асосий ўйинчиси. А Серияда 23 ёшли португалиялик футболчи 12 та гол ва 7 та голли узатмани амалга оширди. Чемпионлар лигасида Рафаэль бир гол урди ва учта голли узатмани амалга оширди.
