"Milan" bosh murabbiyi Stefano Pioli ertaga bo‘lib o‘tadigan "Inter"ga qarshi Chempionlar ligasining birinchi yarim finalida hujumchi Rafael Leau ishtirok etishini istisno etmayapti. Eslatib o‘tamiz, portugaliyalik futbolchi A Seriyaning so‘nggi turida "Lasio" bilan o‘yinda jarohat olgan va shu sabab o‘yin boshida almashtirilgandi.
“Ertaga biz Leauning holatini baholaymiz va uning ishtiroki haqida qaror qabul qilamiz. Agar u o‘zini tayyor his qilmasa, zaxira o‘rindig‘iga ham o‘tirmaydi. Biz futbolchining sog‘lig‘ini xavf ostiga qo‘yishdan ma’no ko‘rmayapmiz", - dedi Pioli o‘yin oldidan o‘tkazilgan matbuot anjumanida.
Leau "Milan"ning joriy mavsumdagi asosiy o‘yinchisi. A Seriyada 23 yoshli portugaliyalik futbolchi 12 ta gol va 7 ta golli uzatmani amalga oshirdi. Chempionlar ligasida Rafael bir gol urdi va uchta golli uzatmani amalga oshirdi.
