Бундан роппа-роса 10 йил аввал, 2013 йилнинг 9 май куни Сэр Алекс Фергюсон фаолиятини якунлаганидан сўнг Дэвид Мойес «Манчестер Юнайтед»нинг янги бош мураббийи бўлиши расман эълон қилинган эди.

Бу клуб ҳаётидаги муҳим воқеа бўлди, чунки Фергюсон 1986 йилдан бери «қизил иблислар» лагерида ишлаб келаётганди. Сэр Алекс ўзининг вориси сифатида Мойесни кўрди.

Афсуски, Мойес «Манчестер Юнайтед»да яхши ишламади. Шотландиялик «Олд Траффорд»даги биринчи мавсумни ҳам тўлиқ якунламади ва 2014 йилнинг апрелида клубни тарк этди. «Қизил иблислар» АПЛда атиги еттинчи ўринни эгаллашди. Мойес бошчилигидаги 51 учрашувда «манкунианликлар» 10 дуранг ва 15 мағлубият, 26 ғалабага эришган.

Эслатиб ўтамиз, «Манчестер Юнайтед» сўнгги бор 10 йил аввал Фергюсоннинг сўнгги мавсумида Англия чемпионига айланганди.