23-28 октябрь кунлари Вьетнам мамлакатининг Хошимин шаҳрида футзал бўйичa халқаро турнир бўлиб ўтади. Мазкур турнирда мезбон Вьетнам терма жамоасидан ташқари Кувайт, Италия ҳамда Ўзбекистон терма жамоалари иштирок этишади.

Таъкидлаб ўтиш лозим, Вьетнамдаги турнир одатдагидан бошқачароқ форматда ўтиши кўзда тутилган. Турнир давомида терма жамоалар ҳам ўртоқлик, ҳам расмий мақомдаги учрашувларда баҳс олиб боришади. Ўзбекистон футзал терма жамоасининг илк учрашуви айнан ўртоқлик учрашуви мақомида ўтказилади ва бу учрашув 24 октябрь куни Вьетнам терма жамоасига қарши бўлиб ўтади.

Хосе Мария Мендес бошчилигидаги футзал терма жамоамизнинг илк расмий ўйини 25 октябрь куни бўлиб ўтади. Шу куни терма жамоамизга Кувайт терма жамоаси рақиб бўлади. Эслатиб ўтиш жоиз, иккала терма жамоа 2012-йилги Осиё чемпионати гуруҳ баҳсларида ўзаро куч синашган ва унда 1:1 ҳисобидаги дуранг натижа қайд этилганди. Шу куни майдон эгалари Вьетнам ҳамда Италия терма жамоалари ҳам ўзаро ўйинда майдонга тушишади.

Ўзбекистон футзал терма жамоаси ўзининг сўнгги учрашувини 27 октябрь куни Италия футзал терма жамоасига қарши ўтказади.

Эслатиб ўтамиз, Ўзбекистон футзал терма жамоаси Вьетнамдаги турнирга йўл олишдан олдин, 15-19 октябрь кунлари Тошкент шаҳрида ўқув-машғулот йиғинини ўтказишади.