Япония ўсмирлар терм жамоаси бош мураббийи Хирофуми Йошитаке финал ўйинидаги мағлубият сабабини руҳий ожизлик ва пенальтилар сериясидаги омадсизлик билан боғлади.

Ўзбекистон ва Япония ўсмирлар терма жамоалари ўртасидаги финал баҳсининг асосий вақти 1:1 ҳисобида якунланганидан кейин, пенальтилар сериясида Ўзбекистон 3:1 ҳисобида ғалаба қозонди. Сарвар Каримов Токума Сузуки ва Коки Сугиморининг зарбасини бартараф этган бўлса, Кохя Китагаванинг зарбаси ноаниқ кетди.

"Бундай ҳолатда бизга руҳий куч керак. Мен футболчиларимни айбламайман. Балки рақиб дарвозабони яхши тургандир, балки зарба кучи унчалик юқори бўлмагандир", дейди Йошитаке ўйиндан кейинги матбуот анжуманида.

"Биз ривожланишда давом этамиз. БААда ўтадиган 17 ёшгача бўлган футболчилар ўртасидаги ЖЧга боришдан олдин бир нечта масалаларни ҳал қилишимиз лозим. Масалан, бугунги ўйинда ўз дарвозамиздан гол ўтказиб юбормаслигимиз мумкин эди. Биз ўзимизга мос бўлган ўйин услубида ўйнашда давом этамиз. Лекин баланд бўйли ўзбекистонликларга қарши ўйинларда узоққа масофага узатмалар иш бермади. Бунинг устида ҳам ишлашимиз керак", дейди у.

"Футбол жамоавий ўйин. Айбни барчамиз баравар бўйнимизга олишимиз керак", дея ўз сўзини якунлади Йошитаке.