Россиянинг Калининград шаҳрида ногирон-ампутантлар ўртасида футбол бўйича 10-жаҳон чемпионатига старт берилди. Ўзбекистон терма жамоаси биринчи ўйинни Туркия устидан 6:1 ҳисобдаги ғалаба билан бошлади, дня хабар беради uzdaily.uz.

Терма жамоамиз футболчилари ўйинни назорат қилиб, устунлик қилдилар. Турклар биринчи бўлимдагина қаршилик кўрсата олдилар, холос. Биринчи голимиздан бир неча дақиқа ўтиб ҳисобни тенглаштирдилар. Биринчи бўлим охирига келиб ҳисоб 3:1 кўринишига келди. Иккинчи бўлимда вакилларимиз тўлиқ устунлик қилдилар.

Ўйиндан сўнг терма жамоамиз бош мураббийи Мавзурхўжа Умархўжаев шогирдлари Калининградга ғолиб бўлиш учун келганликларини таъкидлади ва кетма-кет учинчи бор жаҳон чемпионлигини қўлга киритмоқчи эканликларини билдирди.

"Жамоа таркиби бироз янгиланган, аммо бир неча йилдан буён тўп сураётган фаҳрийлар ҳам бор, ишонаманки, бизда жанговор жамоа бор ва бизлар фаворитмиз", - дейди бош мураббий.

Бугун вакилларимиз кеча Украинага 1:2 ҳисобида ютқазган Япония терма жамоаси билан ўйин ўтказадилар.

Эслатиб ўтамиз, аввалига ногиронлар ўртасида жаҳон чемпионати Японияда ўтказилиши кўзда тутилган эди, аммо рўй берган зилзила сабабли ташкилотчилар мусобақани бошқа ерда ўтказишни лозим топдилар. Ўтказилган тендерда эса Калининград шаҳри ғолиб чиқди.