Кеча Жанубий Корея Кей-лигасида навбатдаги турнинг сўнгги ўйини бўлиб ўтди. Унда ОЧЛ ярим финалида мамлакатимиз чемпиони «Бунёдкор»га рақиблик қиладиган «Улсан Хёнде» клуби ўз уйида «Жежу Юнайтед»ни қабул қилди. Ушбу ўйин 0:0 ҳисобидаги нурсиз дуранг билан тугади.
Бу ўйин Жанубий Кореянинг ОЧЛда қолган ягона вакили иштирокида бўлганлиги туфайли катта қизиқиш билан кузатилди. Жумладан, «Sports Seoul» нашри ўйиндан кейин шундай ёзади: «ОЧЛда муваффақиятли қатнашаётган «Улсан» Кей-лигада ўзи хоҳлагандек натижага эриша олмаяпти. Бош мураббий Ким Хо Гон ҳам ўйиндан кейин «Бор эътиборни ОЧЛга қаратамиз», деди. Бу дурангдан сўнг «Улсан» 16та ғалаба, 10та дуранг ва 8 мағлубият қайд этган ҳолда, Кей-лигада 4-ўринга жойлашган. 3-ўриндаги «Сувон»дан 4очкога ортда қолаётган бўлса-да, «Улсан» ҳисобида «Поханг Стилерс» билан қолдирилган ўйин ҳам бор. Бу йил ҳам ОЧЛга бериладиган йўлланмалар учун кураш қизийдиган бўлиб турибди».
Нашр «Улсан»нинг ҳолатига унчалик хавас қилиб бўлмаслигини бот-бот таъкидламоқда: «ОЧЛ ва Кей-лигада юқори мақсадларни кўзлаган «Улсан» бу ой ўрталаридан бошлаб «азобли рейс»ни бошлайди. Тақвим «Улсан»га кутилмаган сюрпризларни тайёрлаган кўринади: ОЧЛ ярим финал ўйинлари, Кей-лигадаги кетма-кет ўйинлар, шунингдек, 4 нафар етакчи футболчиларини терма жамоа ихтиёрига жўнатиш. Хуллас, осон бўлмаган вазият юзага келди. Бунинг устига бу турда Кей-лигада 3-ўрин учун курашдаги асосий рақобатчилари бўлмиш «Сувон» ва «Поханг Стиллерс»лар ўз қопига навбатдаги 3 очкони солиб қўйишди».
Нашр хабарига кўра, «Улсан» - «Жежу Юнайтед» ўйинидан аввал улсанликлар бош мураббийи Ким Хо Гон чуқур уф тортган кўйи: «ОЧЛ ярим финалига чиқишимиз билан тақвим бизни сиқувга ола бошлади», деган. Бу дуранг «Улсан»ни қониқтирмаган бўлса, «Жежу Юнайтед»ни эса 7-ўриндан бир поғона юқорига олиб чиққан. Ўйиндан сўнг бош мураббий Ким Хо Гон: «Кей-лигада шундоқ ҳам очко муҳим бўлиб турганда бу натижа афсусланарли бўлди. Футболчиларимиз Саудия Арабистони сафаридаги чарчоқларидан фориғ бўлишга улгуришмади», дея ўз фикрини билдирди. «14 октябрдан бошлаб 2 ҳафта мобайнида ОЧЛ ярим финалларини қўшиб хисоблаганда 5та ўйин ўтказамиз. Энди эътиборимизни ОЧЛга қаратишимиз лозим. Машғулотларда жон куйдириб шуғулланган футболчиларга ўйнаш имконини бермоқчиман».
Отабек Йўлдошев Жанубий Корея, Сеул.
