"Барселона" ҳимоячиси Жюль Кунде бир қанча Премьер-лига клубларининг нишонига айланган. Журналист Жерар Ромеронинг фикрича, франциялик футболчи фаолиятини АПЛда давом эттириши мумкин.
Эслатиб ўтамиз, Кунде "Барселона"да ўнг қанот ҳимоячиси ўйнаётганидан норози. Франциялик футболчи раҳбарият ва мураббийнинг келаси мавсумда ҳимоя марказига қайтиши ҳақидаги ваъдаларига ишонмаяпти. Аввалроқ Каталония жамоаси футболчини ёзда 90 миллион евро эвазига қўйиб юборишга рози бўлиши ҳақида хабар берилганди.
Кунде ўтган ёзда Англия Премьер-лигасида иштирок этиши мумкин эди, аммо унинг Лондоннинг "Челси" клубига ўтиши сўнгги дақиқада амалга ошмай қолди. "Кўклар" ўшанда Жюлнинг ўрнига "Лестер"дан Уэсли Фофанани сотиб олишди.
