Ҳодиса Сан-Сальвадор пойтахтидаги "Кускатлан" стадионида "Альянс" ва "ФАС" жамоалари ўртасидаги ўйин олдидан содир бўлган. Дарвозалар ёпилган пайтда кўп сонли мухлислар трибунага киришга ҳаракат қилишди - расмийлар қалбаки чипталар айрим мухлисларга сотилган деб ҳисоблаб, тергов ишлари олиб борилаётганини айтишган. Расмий маълумотларга кўра, тиқилинчда камида 12 киши ҳалок бўлган, 90 дан ортиқ киши жароҳатланган. 500 дан ортиқ кишига тиббий ёрдам кўрсатилди.

Сальвадор футбол федерацияси миллий чемпионатни муддатидан аввал тугатишга қарор қилди. Чемпион аниқланмайди, халқаро турнирлар иштирокчилари эса ўтган мавсум натижаларига кўра аниқланади. Шунингдек, айни дамда федерация стадионларда хавфсизлик чораларини кучайтириш масаласида ФИФА ва КОНКАКАФ билан маслаҳатлашаётгани хабар қилинган.

Ўз навбатида, Сальвадор Олий лигаси футболчилари ассоциацияси бундай қарорга қарши чиқди ва вазиятни муҳокама қилиш учун шошилинч йиғилиш эълон қилди. Касаба уюшмаси норозилигини билдириб, федерация футболчиларнинг фикрини инобатга олмасдан шундай қарорга келганини айтди.