Ўзбекистон халқ артисти Озодбек Назарбеков мамлакатимиз чемпиони “Бунёдкор” футбол клубини мадҳ этувчи янги асарни кенг оммага тақдим этди.

Ушбу асар “Бунёдкор” футбол клуби мадҳияси сифатида қабул қилинди.

Мадҳия матни Ботир Эргашев қаламига тегишли бўлиб, унда жамоамизнинг Истиқлол йилларида бунёд бўлгани, халқаро майдонлардаги муносиб иштироки ҳамда юртимиз байроғини кўкларга кўтараётгани жуда чиройли ифодаланган.

“Бунёдкор” футбол клуби мадҳиясини яратиш ғояси клуб вице-президенти Хусниддин Хусанов ва клуб тижорат ишлари директори Айниддин Ғиёсов ташаббуси билан бошланган бўлиб, бир тўхтамга келинган якуний фикр-мулоҳазалар Ўзбекистон халқ артисти Озодбек Назарбеков бошчилигидаги ижодий гуруҳга тақдим этилди. “Бунёдкор” ФК мадҳиясини яратиш жараёнида жамоа мухлисларининг таклиф ва тавсиялари ҳам инобатга олинди.

“Бунёдкор” ФК мадҳиясида нафақат ёш клубнинг қисқа муддат ичида эришган ютуқлари, хозирги кунда қўлга киритаётган зафарли одимлари, шунингдек улкан муваффақиятларга ундовчи ёрқин келажак ҳақида куйланган.

Ўзбекистон халқ артисти Озодбек Назарбеков томонидан ижро этилган “Бунёдкор” ФК мадҳиясини ушбу ҲАВОЛА орқали кўчириб олишингиз мумкин.

“Бунёдкор” ФК мадҳияси матни
Озод юртда обод бўлдинг,
Юрт шаънига мададкор.
Истиқлолдан бунёд бўлдинг,
“Бунёдкор”!

Зафарларга олға бор,
Ортингда биз - халқинг бор,
Сен - бизларга ифтихор,
“Бунёдкор”!

Омад юрган йўлингда,
Юрт байроғи қўлингда.
Ватан довруғин ўйла,
Мухлислар учун ўйна.
“Бунёдкор”!

“Қалдирғоч”сан, парвозинг зўр,
Осиёда овозинг зўр,
Шиддатинг, эҳтиросинг зўр,
“Бунёдкор”!

Етти иқлим номинг билсин,
Ғалабангдан базм қилсин,
Сенга дунё таъзим қилсин,
“Бунёдкор”!

Миллионларни айла хуш,
Бўлгин гўёки бир мушт,
Ватан деб майдонга туш,
“Бунёдкор”!

Омад юрган йўлингда,
Юрт байроғи қўлингда.
Ватан довруғин ўйла,
Мухлислар учун ўйна.
“Бунёдкор”!