Оливер Кан ва Ҳасан Салиҳамиджич ўрнига келадиган "Бавария"нинг янги раҳбарияти ярим ҳимоячи Жошуа Киммихни "Барселона"га сотмоқчи эмас. Бу ҳақда журналист Фабрицио Романо хабар берди.
Мюнхенликларнинг аввалги раҳбарлари 28 ёшли Киммихни "тегиб бўлмас" футболчи деб билишган ва уни келажакдаги лойиҳада асосий ўйинчи сифатида кўришган. “Бавария”нинг янги раҳбарияти ҳам худди шундай фикрга амал қилишади. Шу тариқа, Киммихни Серхио Бускетснинг ўрнига мукаммал ўринбосар сифатида кўраётган "Барселона" уни қўлга кирита олмайди.
2015 йилдан буён “Бавария”да ўйнаб келаётган 28 ёшли Киммих жамоани тарк этиши ва янги чақирув излаши аввалроқ хабар қилинганди. Ўтган мавсумда у 47 та ўйинда майдонга тушиб, 7 та гол урди ва 11 та голга ассистентлик қилди.