Сербиялик ярим ҳимоячи Сергей Милинкович-Савич келаси ёзда клубини ўзгартириши мумкин.
Il Messaggero журналистлари футболчини қўлга киритиш учун курашда қайси клуб фаворит эканлигини аниқлади.
Туриннинг "Ювентус" клуби ярим ҳимоячини қўлга киритиш учун энг катта имкониятга эга. “Кекса сенёра” раҳбарияти Сергейга йилига олти миллион евро тўлашга тайёр. Милинкович-Савичнинг трансфер суммаси 30-40 миллион еврони ташкил қилиши мумкин.
28 ёшли ярим ҳимоячи 2015 йилнинг августидан буён «Лацио» сафида тўп тепади. Томонлар ўртасидаги амалдаги шартнома муддати 2024 йилнинг ўрталаригача ҳисобланган.
Ярим ҳимоячи жорий мавсум А Серияда 35 та ўйинда майдонга тушиб, 9 та гол урди ва 8 та голли узатмани амалга оширди.
