Европа лигаси финали бош ҳаками Энтони Тейлор ва унинг оиласи "Рома" мухлислари томонидан тазйиқларга учради.
Уларнинг йўллари "Рома" ва "Севилья" ўртасидаги финал баҳси (1:1, пенальтилар сериясида 1:4) бўлиб ўтган Будапешт аэропортида кесишди.
Мухлислар англиялик ҳакамни таъқиб қила бошлаганидан сўнг, Тейлор ва унинг оиласи аэропорт хавфсизлик хизмати томонидан кафедан чиқариб, хавфсиз ҳудудга олиб кетилган. Римлик мухлислар гуруҳи томонидан стул ва шиша ҳакам томон учиб келди.
Будапешт аэропорти безориликда айбланган Италия фуқаросига нисбатан жиноий иш қўзғатилганини маълум қилди.
Ўйиндан сўнг "Рома" бош мураббийи Жозе Моуриньо ҳам Тейлорнинг ишидан норози бўлди. Хусусан, Жозе ОАВга берган изоҳида: "Энтони Тейлор испаниялик бўлиб туюлди", деган ва инглиз ҳаками стадионни тарк этаётганда, португалиялик мураббий унга: “Сен шармандасан!” деб қичқирди.
