Yevropa ligasi finali bosh hakami Entoni Teylor va uning oilasi "Roma" muxlislari tomonidan tazyiqlarga uchradi.
Ularning yo‘llari "Roma" va "Sevilya" o‘rtasidagi final bahsi (1:1, penaltilar seriyasida 1:4) bo‘lib o‘tgan Budapesht aeroportida kesishdi.
Muxlislar angliyalik hakamni ta’qib qila boshlaganidan so‘ng, Teylor va uning oilasi aeroport xavfsizlik xizmati tomonidan kafedan chiqarib, xavfsiz hududga olib ketilgan. Rimlik muxlislar guruhi tomonidan stul va shisha hakam tomon uchib keldi.
Budapesht aeroporti bezorilikda ayblangan Italiya fuqarosiga nisbatan jinoiy ish qo‘zg‘atilganini ma’lum qildi.
O‘yindan so‘ng "Roma" bosh murabbiyi Joze Mourinyo ham Teylorning ishidan norozi bo‘ldi. Xususan, Joze OAVga bergan izohida: "Entoni Teylor ispaniyalik bo‘lib tuyuldi", degan va ingliz hakami stadionni tark etayotganda, portugaliyalik murabbiy unga: “Sen sharmandasan!” deb qichqirdi.
