Кеча Самарқанд шаҳридаги «Олимпия» стадионида биринчи лигада қолиш учун ўтиш баҳслари яъни, «пулька» бошланди. Мазкур мусобақада биринчи лиганинг биринчи босқичидан ўта олмаган жами 8 жамоа иштирок этиши керак эди, бироқ баъзи сабабларга кўра тўртта жамоа қатнашадиган бўлди. Мусобақада «Ғарб» минтақасидан «Машъал-Академия» билан «Орол», «Шарқ» минтақасидан эса «Пахтакор-2» билан «Зомин» иштирок этмоқда. Айрим сабабларга кўра, «Бунёдкор-2», «Атласчи», «Регистон» ва «Сурхон» сингари клублар Самарқандга етиб кела олишмади. Натижада тўрт жамоа ўзаро баҳс олиб борадиган ва 1-2-ўринларни банд этган клублар кейинги йил ҳам биринчи лигада қоладиган бўлишди.

«Машъал»нинг биринчи лигадаги фарм-клуби «пулька»даги дастлабки учрашувни «Пахтакор-2»га қарши ўтказиб, 1:1 ҳисобини қайд этди. Муборакликлар бош мураббийи Дилшод Андаевнинг айтишича, бу ўйинда шогирдларидан Сардор Абдураимов гол урган, шунингдек ўйин охирларида Турсунмурод Ҳамдамов қизил карточка олиб майдондан четлатилган. Андаевнинг айтишича, ўйинни бошқариб борган хоразмлик ҳакам Темур Галеев (назоратчи Булат Галеевнинг ўғли) кўп ҳолларда «пахтакорчилар»га ён босган ва у негадир «Машъал-Академия»нинг учта голини инобатга олмаган.

«Орол» ва «Зомин» ўртасида кечган беллашувда ҳам 1:1 ҳисоби қайд этилди. «Пулька»дан ўрин олган навбатдаги баҳслар эртага давом эттирилади.