5. Саудия Арабистони Про-лигаси

Мбаппенинг Европада қолиши аниқ. Аммо саудияликлар бир каррага бўлса ҳам, аниқки, футболчининг менталитетини синовдан ўтказиб кўради. Арабистон футбол чемпионатининг катта тўртлик жамоалари Саудия жамоат фонди томонидан васийликка олинганидан кейин, пул муаммога айланмай қолди. Мбаппега ҳам мамлакатнинг гигант жамоалари истаганича пул беради. Аммо ҳужумчининг ўзи ҳали камида 10 йил Европада фаолият юритиши мумкин. Қолаверса, 24 ёшли футболчи ҳали ЕЧЛ ва "Олтин тўп"ни ютиши керак.

4. "Ливерпуль"

Мбаппе учун ҳаракат фақатгина Муҳаммад Салоҳ ўрни бўшасагина реалликка айланади. Мисрлик футболчи мерсисайдликларнинг омадсиз мавсумидан кейин Европа лигасида ҳаракат қилишга мажбур. Шу сабаб Салоҳ клубдан кетиши ҳам мумкин. Агарда шундай бўлса, Салоҳ учун ягона вариант бу "Реал" бўлади. Мбаппе эса "Ливерпул"га келиши амри-маҳол. Негаки, унинг ҳафтасига 1 миллион евролик маошини тўлаш, Англиянинг исталган клубига оғирлик қилади.

3. "Манчестер Сити"

"Манчестер Сити" яқиндагина ЕЧЛни ютиш орқали треб қайд этган тарихдаги иккинчи инглиз клубига айланган эди. Гвардиола Холанд билан шу натижани қайд этди. Аммо скавдинавиялик махлуқ ва Мбаппени бир жамоада тасаввур қилиш ўта қийин ишдир. Бахтимизга бу кўчиш эҳтимоли жуда паст. Негаки, амалда бу трансферга молиявий фейр плей қоидалари аралашади. Қолаверса, ҳозир "Манчестер Сити" ҳужумчида муаммолар йўқ. Жамоа ярим ҳимоя ҳақида қайғуриши керак.

2. "МЮ"

Балки Мбаппе АПЛга бошқа Манчестер клуби орқали келар? Албатта, "МЮ"да французни жалб этиш учун пул етарли. Айниқса, клуб қатарликлар қўлига ўтгундек бўлса, янада қудратли таркиб барпо этиш мумкин бўлади. Боз устига, клубга ҳужумчи зарур бўлиб турган бир пайтда, Мбаппе танлови жуда ҳам мос тушади. Аммо позицион жиҳатдан у Рэшфордга ўхшаш, марказда эмас, қанотда ўзини яхши ҳис қилади.

1. "Реал Мадрид"

"Реал"нинг Мбаппе билан боғлиқ ҳикояси 2017 йилга бориб тақалади. Ўшанда "ПСЖ"  ҳужумчини мадридликлар тумшуғи тагидан ӯғирлаб кетганди. Шундан бери Флоринтино Перес Мбаппени сотиб олишга ҳаракат қилиб келмоқда. Аммо "ПСЖ" ҳар қандай таклифларни рад этмоқда. Ҳатто, ҳозир ҳам Килианга энг жиддий даъвогар "Реал" саналади. Бу орзу шу ёзда амалга ошиши мумкин. Пересдан эса тезроқ отни қамчилаш талаб этилади.

ИСМАТОВ Ж.