Бугун, 19 октябрь куни республикамизнинг бир қатор стадионларида футбол бўйича мамлакат олий лига жамоалари ўртасида 23-турнинг олти учрашуви ўтказилади.
Турнинг марказий учрашуви Қарши шаҳрида маҳаллий “Насаф” ҳамда чемпионат пешқадами Тошкентнинг “Пахтакор” жамоалари ўртасида бўлиб ўтади.
Бу йилги чемпионат баҳсларини якунланишига 4 тур қолганлигини ва ҳозирда ҳар икки жамоа ҳам олтин медаллар учун кураш олиб бораётганлигини инобатга олсак, учрашувни муросасиз курашларга бой тарзда ўтишини тахмин қилиш мумкин. Шу кунга қадар ўтказилган 22 тур ўйинларининг якунларига кўра “Пахтакор”чилар ҳисобида 47 очко мавжуд бўлса, “Насаф” жамоаси ҳисобида 45 очко бор. Ушбу жамоаларнинг биринчи даврада ўтказилган дастлабки учрашувида ҳисоб очилмаган эди.
Шу ўринда, “Насаф” – “Пахтакор” жамоаларининг шу кунга қадар мамлакат чемпионатида ўтказган ўзаро учрашувларига назар ташласак, ушбу жамоалар шу кунга қадар олий лигада ўзаро 31 марта куч синашишганлигига гувоҳ бўламиз.
Тошкентликлар ўтказилган 31 учрашувнинг 17 тасини ўз фойдаларига ҳал қилган бўлсалар, 7 та баҳсда “Насаф” жамоаси ғалаба қозонган. Ва яна 7 ўйинда дуранг натижа қайд этилган. Тўплар нисбати ҳам “Пахтакор” фойдасига 44-25.
Қизиқ жиҳати, 2007 йилдан буён “Насаф” жамоаси “Пахтакор”ни ўз майдонида енга олмаяпти. Сўнгги беш йилда “Пахтакор”чилар 2 ўйинда ғалаба қозониб, уч учрашувда дурангга имзо чекишган.
Қаршида ўтган сўнгги беш учрашув:
09.11.2011 “Насаф” – “Пахтакор” 1:1
05.06.2010 “Насаф” – “Пахтакор” 1:1
25.10.2009 “Насаф” – “Пахтакор” 0:0
25.08.2008 “Насаф” – “Пахтакор” 0:1
16.09.2007 “Насаф” – “Пахтакор” 0:1
23-турда амалдаги чемпион Тошкентнинг “Бунёдкор” клуби ўз майдонида Наманганнинг “Навбаҳор” жамоасини қабул қилади. Ўтказилган 22 тур ўйинларининг якунларига кўра 45 очкога эга “Бунёдкор”чилар турнир жадвалида “Пахтакор” ва “Насаф” жамоаларидан кейин учинчи ўринда боришмоқда.
Бугун бўлиб ўтадиган 23-тур учрашувларида эса қуйидаги жамоалар ўзаро куч синашадилар.
23-тур. 19.10.2012
15.30. “Металлург” (Бекобод) - “Шўртан” (Ғузор)
15.30. “Динамо” (Самарқанд) - “Андижон” (Андижон)
16.00. “Нефтчи” (Фарғона) - “Локомотив” (Тошкент)
16.00. “Бухоро” (Бухоро) - “Қизилқум” (Зарафшон)
17.30. “Насаф” (Қарши) – “Пахтакор” (Тошкент)
18.30. “Бунёдкор” (Тошкент) – “Навбаҳор” (Наманган)
23-турнинг сўнгги учрашуви 20 октябрь куни Олмалиқ шаҳрида маҳаллий “Олмалиқ” ҳамда Муборакнинг “Машъал” жамоалари ўртасида бўлиб ўтади. Ушбу учрашув соат 15.30 бошланади.
Шавкат Жалилов
Маданият ва спорт ишлари вазирлиги матбуот хизмати
