“Бенфика”нинг 21 ёшли ҳужумчиси Гонсалу Рамуш ва Лиссабоннинг “Спортинг” клубининг 22 ёшли ярим ҳимоячиси Мануэль Угарте ўтган мавсум якунлари бўйича Португалия чемпионатининг энг қиммат футболчилари сифатида эътироф этилди.

Шу тариқа, ҳар икки футболчининг тахминий баҳоси, transfermarkt маълумотларига кўра, 50 миллион еврони ташкил қилади.

Учинчи ва тўртинчи ўринлар “Бенфика”нинг 19 ёшли марказий ҳимоячиси Антонио Силва ва “Порту” дарвозабони Диогу Коштага насиб этди. Портал иккала футболчини ҳам 45 миллион еврога баҳоламоқда.

“Порту” ярим ҳимоячиси Отавиу энг қиммат футболчилар бешлигини ёпди – унинг нархи 35 миллион еврога баҳоланмоқда.

Эслатиб ўтамиз, "Бенфика" ўтган мавсумда "Порту"ни 2 очкога ортда қолдирган ҳолда Португалия чемпионига айланганди.