Лондоннинг «Арсенал» клуби тез орада «Адидас» фирмаси билан ҳомийлик шартномасини имзолайди. Бу ҳақда «The Telegraph» нашри хабар тарқатмоқда.

Газтенанинг ёзишича, дунёнинг энг машҳур футбол экипировкалари чиқарувчи фирма билан шартнома эвазига «Арсенал» йилига 25 миллион фунт  стерлинг ишлаб топади.

«Арсенал»нинг «Nike» билан амалдаги шартномаси 2013/2014 йилги мавсум сўнгига қадар давом этади. Бу шартномага мувофиқ канонирлар йилига 13 миллион фунт стерлинг ишлаб топадилар. «Nike» фирмаси маҳсулотларини мухлислар томонидан сотиб олиниши бўйича «Арсенал» «Манчестер Юнайтед» ва «Барселона»дан кейин учинчи ўринда туради. Ҳар йили «канонирлар»нинг футболкасини тахминан 800 минг мухлис харид қилади.

Қайд этиб ўтиш жоиз, «Адидас» «Арсенал»га ўтган мавсумда «Ливерпуль» билан шартномаси тугагач, таклиф билан чиққанди. «Адидас» 90-йиллар ўрталарида «Арсенал»га ҳомийлик қилганди. Энди бундан буёғига улар яна жамоага ҳомийлик қилишади. Шунингдек корхона «Фулҳэм»нинг ҳам ҳомийсига айланади.