Суперлига 8-туридан ўрин олган “Нефтчи” – “Насаф” (2:1) учрашувидан сўнг меҳмонлар устози Рўзиқул Бердиев ўз фикрларини билдириб ўтди.
“Бугун икки жамоа ҳам бир хил схемада ўйнагани учун асосан юқоридаги тўп учун кураш бўлди. “Нефтчи” буни яхши ўзлаштирган ва асосан узун тўплар билан ва стандартларда яхши ҳаракат қилади. Бугун ҳам шундай бўлди. Узун паслар, тўп учун кураш кўп бўлди. Пеналти ва жарима зарбасидан осон гол ўтказдик. Бу вазиятда футболчиларда ҳам, дарвозабонда ҳам айб бор.
Ҳакамлар майдондаги энг муҳим шахслардан бири саналади, аммо уларни муҳокама қилмоқчи эмасман. Айбни улардан эмас, ўзимиздан излаган маъқул. Ҳужумда кутилганидек ҳаракат қилмадик. “Нефтчи” сингари узун паслар билан ўйнайдиган жамоага қарши ҳаракат қилишга у қадар кўникмаганмиз ва бу бироз қийинчилик туғдирди. Биз бу нарсага унчалик ҳам тайёр эмасдик.
Мозговой бизнинг асосий футболчимиз. Эрталаб майдонга туша олмаслигини билдирганидан сўнг уни қайдномага киритмадик. Албатта, унинг ўрни билинди. Унинг ўрнида Эшмуродов ҳам ёмон ҳаракат қилмади. Стандарт вазиятларда рақибга имконият бердик.
Ўйлашимча, дуранг адолатли натижа бўларди. Вазиятлар кам бўлишини билардик. Шу сабаб ҳам стандарт вазиятлардан фойдаланиш керак эди. Рақиб буни яхшироқ уддалади. Ўша вазиятларда биз хато қилдик.
Жамоамиздаги асосий муаммо бу ҳужум чизиғи. Ҳозирда яхши ҳужумчи излаяпмиз. Олдинги чизиқ учун янги футболчилар бизга керак”, – деди Бердиев.
