Журналист Фабрицио Романонинг сўзларига кўра, Мейсон Маунтнинг "Челси"дан "Манчестер Юнайтед"га ўтиши бугун якунланади.
Аввалига футболчини тиббий кўрикдан ўтказиш режалаштирилган, шундан сўнг томонлар яна бир йилга узайтириш имконияти билан 2027/28 йилги мавсум охиригача шартнома имзолайди. Ўз тарбияланувчиси учун "Челси" 55 миллион евро олади. "Манчестер Юнайтед" келаси беш йил ичида совринларни қўлга киритса, лондонликлар яна 5 миллион олишлари мумкин.
Маунт "Челси"нинг асосий жамоасида деярли тўрт йил ўйнади. Мейсон Премьер-лигадаги дебютини 2019 йил 12 август куни “Манчестер Юнайтед”га қарши ўтказганди. Ўшанда "Челси" ўз майдонида 0:4 ҳисобида мағлуб бўлганди.
Ҳаммаси бўлиб Маунт ўз жамоаси учун барча мусобақаларда 195 та ўйин ўтказиб, 33 та гол ва 37 та голли узатмани амалга оширган.