Милан суди Италиянинг собиқ бош вазири Сильвио Берлусконини, Mediaset компаниясида амалга оширилган молиявий қаллобликларда айбдор деб топиб, тўрт йиллик қамоқ жазосига ҳукм қилди. Бу ҳақда Италиянинг AGI ахборот агентлиги хабар бермоқда. Бундан ташқари, ANSA ахборот агентлиги хабарига кўра, Берлусконига уч йил давомида давлат лавозимларини эгаллаш тақиқлаб қўйилган. Бошқа айбловлар бирга, Mediaset жиноий иш бўйича Италия солиқ хизматига 10 миллион евро миқдорида жарима тўлаши ҳам белгилаб қўйилди.
Sky TG24’нинг ёзишича, прокурор сиёсатдонни 3 йилу 8 ойлик қамоқ жазосига ҳукм қилишни сўраган. Айни вақтда, Милан прокурори томонидан 3 йилу 4 ойлик қамоқ жазосига ҳукм қилиниши сўралган Mediaset президенти Феделе Конфалоньери (Fedele Confalonieri) суд томонидан оқланган.
Ҳукм ўқиб эшиттирилган вақтда Берлусконининг ўзи судда бўлмаган. Унинг адвокатлари суд қарори бўйича бирор изоҳ беришмаган.
Берлускони Италиядаги энг йирик медиа гуруҳлардан бири ҳисобланган Mediaset’нинг асосчиси ҳисобланади. Медиагуруҳдаги фирибгарликлар бўйича иш 2006 йилда очилган. Прокуратура маълумотларига кўра, Берлусконилар оиласига тегишли компания Америка телекўрсатувлари ва кинофильмларини трансляция қилиш ҳуқуқини 470 миллион долларга сотиб олган. Харид оффшор компаниялари орқали амалга оширилган. Муаллифлик ҳуқуқларининг нархи борасидаги қаллоблик ҳисобига Берлускони ва унинг шериклари солиқ тўловларидан қочишга эришишган.
Собиқ бош вазир ва бошқа айбдорлар ўз айбларини инкор этишмоқда. Милан судининг қарори юқори инстанциялар томонидан рад этилиши мумкин.
Италия судлари бунгача ҳам Берлусконига қарши шунга ўхшаш ишларни кўриб чиқишган. Жумладан, 2012 йилнинг ёзида Рим суди далиллар етарли бўлмагани сабаб ишни ёпган бўлса, 2011 йилнинг октябрида Милан суди сиёсатчига қўйилган айбловларни бекор қилганди. Ушбу ишларда ҳам Mediaset’нинг муаллифлик ҳуқуқларини сотиб олишда солиқдан бўйин товлагани масаласи кўриб чиқилган эди.
